Andijon viloyati hokimi Shuhratbek Abdurahmonov boshchiligidagi delegatsiya aʼzolari ayni paytda Xitoy Xalq Respublikasida boʻlib turibdi. Dastlab Szyansi provinsiyasidagi “Jiangxi Changnan Construction Group” hamda “Limin Zhongsheng Real Estate Development” kabi yirik kompaniyalar vakillari bilan uchrashuvlar oʻtkazildi. Muloqot chogʻida infratuzilma qurilishi, muhandislik loyihalarini amalga oshirish va avtomobil ehtiyot qismlarini ishlab chiqarish sohalarida hamkorlikni yoʻlga qoʻyish masalalari muhokama qilindi.

— Muzokaralar ijobiy ruhda oʻtmoqda, — deydi viloyat hokimligi masʼul xodimi Rustamjon Eshonov. — Xitoyning tajribali kompaniyalari bilan hamkorlik qilish orqali viloyatimizda yangi ishlab chiqarish korxonalarini tashkil etish, zamonaviy texnologiyalarni joriy etish va yangi ish oʻrinlarini yaratish boʻyicha muhim kelishuvlarga erishilmoqda.

Ayni paytda “Limin Zhongsheng Real Estate Development” kompaniyasi bilan Andijonda avtomobil ehtiyot qismlarini ishlab chiqarishga oid memorandum imzolandi. Safar doirasida yirik investitsiya loyihalarini amalga oshirish boʻyicha hamkorlikni yanada kengaytirish rejalashtirilgan.

Saminjon HUSANOV

“Xalq soʻzi”.