Butunjahon antidoping agentligi (WADA) Prezidenti Vitold Banka Oʻzbekistonga keladi. Bu haqda Milliy Olimpiya Qoʻmitasi axborot xizmati xabar berdi. 

Xabarda aytilishicha, joriy yilning 22-23-may kunlari Toshkentda Butunjahon antidoping agentligi (WADA)ning Osiyo va Okeaniya mamlakatlari sport vazirliklarining 19-hukumatlararo yigʻilishi boʻlib oʻtadi. 34 mamlakatdan delegatlar qatnashadigan ushbu nufuzli tadbirga WADA Prezidenti Vitold Banka va boshqa koʻplab faxriy mehmonlar tashrif buyuradi. 

Bugun, 15-may kuni Sport vazirligida mazkur tadbirni yuqori saviyada tashkil etish masalalariga bagʻishlangan yigʻilish boʻlib oʻtgan.

Unda vazir Adham Ikramov, MOQ Bosh kotibi Oybek Kasimov hamda Milliy antidoping agentligi direktori Abdushukur Sadikov, shuningdek, masʼul tashkilotlar vakillari ishtirok etgan.

Qayd etish joiz, WADA oʻz faoliyatini boshlaganidan beri beri ushbu tashkilotning hech bir rahbari Oʻzbekistonga tashrif buyurmagan. Shu bois, Adham Ikramov boʻlajak tadbirni yuqori saviyada oʻtkazish ne chogʻlik muhim ekanini taʼkidlab, masʼullarga uni munosib tashkil etish boʻyicha topshiriq bergan.

Uchrashuvda xalqaro tadbirning kun tartibidan oʻrin olgan masalalar muhokama qilinib, sohada yanada ildam qadamlarni tashlash maqsadida xalqaro ekspertlar, martabali mehmonlar bilan rasmiy uchrashuvlar tashkil etish masalalari ham koʻrib chiqilgan.