14-yanvar Vatan himoyachilari kuni va Oʻzbekiston Respublikasi qurolli kuchlari tashkil topganligining 34-yillik bayrami Samarqandda ham keng nishonlandi. Dastlab viloyat hokimligi, jamoatchilik vakillari va harbiylar Amir Temur maqbarasida boʻlib, Sohibqiron qabrini ziyorat qilishdi va oʻtganlarning ruhiga Qurʼon tilovat qilindi.

Shundan soʻng barcha Amir Temur haykali yoniga toʻplandi. Yigʻilganlar buyuk coxibqiron bobomizning ulugʻvor haykali poyiga gulchambarlar qoʻyib, uning siymosi oldida hurmat bajo keltirdilar.

Vatan himoyachilari kuni munosabati bilan viloyatda oʻtkazilayotgan bayram tadbirlari dasturi doirasida Samarqand shahrida Qurolli Kuchlar tarkibiga kiruvchi vazirlik va idoralar harbiy boʻlinmalarining tantanali yurish marosimi ham boʻlib oʻtdi. Registon koʻchasidan boshlangan harbiy yurish Koʻksaroy maydonigacha davom etdi.

Koʻksaroy maydonida harbiy texnika va qurol-aslahalar namoyishi, koʻrgazmali jangovar chiqishlar tashkil etildi. Tadbirda qatnashgan samarqandliklar bevosita harbiylarimiz tomonidan ishlatilayotgan bugungi texnika vositalari bilan tanishish imkoniyatiga ega boʻldilar.

Abdulaziz YOʻLDOSHEV, “Xalq soʻzi”.