Arxiv foto

Rossiya va AQSH oʻrtasidagi munosabatlar Vashington uchun juda muhim. Bu haqda AQSH prezidentining maxsus vakili Stiv Uitkoff “Bloomberg” telekanaliga bergan intervyusida aytib oʻtdi.

“Rossiya Federatsiyasi bilan munosabatlar biz uchun juda muhim. Ular hamma narsaga taʼsir qiladi: Xitoy, Eron, Yaqin Sharq”, — deydi AQSH prezidentining maxsus vakili.

Bundan tashqari, u ikki davlat oʻrtasida yadroviy arsenallarni qisqartirish boʻyicha kelishuv butun dunyo uchun manfaatli boʻladi, degan fikrni bildirdi. “Qoʻshma Shtatlar uchun bu harbiy byudjetni qurolli toʻqnashuvdan koʻra muhimroq narsalarga qayta taqsimlashni anglatadi” — deydi Uitkoff.

Bungacha AQSH yetakchisining maxsus vakili Rossiya va AQSH prezidentlari Vladimir Putin va Donald Tramp oʻrtasidagi suhbat natijaga qaratilgani va ularning uchrashuvi katta ehtimol bilan boʻlib oʻtishini aytgandi.

Rossiya va AQSH prezidentlari Vladimir Putin va Donald Tramp oʻrtasidagi telefon muloqoti 18-mart kuni boʻlib oʻtdi. Natijada Rossiya Ukrainaning energetika infratuzilmasiga zarba berishdan tiyilishga rozi boʻldi. Boshqa barcha masalalar boʻyicha muzokaralar davom etadi.

Xususan, Rossiya Federatsiyasi Ukrainada 30 kunlik oʻq uzishni toʻxtatish davrida majburiy safarbarlikni toʻxtatish haqidagi qarorni kutmoqda. Rossiya Federatsiya Kengashi AQSH bu talabni qoʻllab-quvvatlashi mumkinligini, ammo Kiyev rasmiylari buni dushmanlik bilan qabul qilishi mumkinligini taʼkidladi.