Andijon, Navoiy hamda Qashqadaryo viloyatlariida kredit mablagʻlarini oʻzlashtirish holatlari aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Maʼlum qilinishicha, departamentning Buloqboshi tuman boʻlimi tomonidan oʻtkazilgan tergovga qadar tekshiruvlarda “B.t.” MCHJ masʼul shaxslari va boshqalar parrandachilik faoliyatini tashkil etishda uskunalar sotib olish uchun tijorat banki filialidan ajratilgan kredit mablagʻlarining 5,2 mlrd soʻmini, “Z.t.” MCHJ masʼul shaxslari esa tikuv dastgohlari sotib olish uchun ajratilgan 950 mln soʻm imtiyozli kredit mablagʻini oʻzlashtirish yoʻli bilan talon-toroj qilganliklari aniqlangan.

Departamentning Karmana tuman boʻlimi tomonidan oʻtkazilgan tergovga qadar tekshiruvda “K.C.H.” oilaviy korxonasi rahbari X.Ya. mineral oʻgʻit va yoqilgʻi moylash mahsulotlari xarid qilish uchun hududiy tijorat banki filialidan ajratilgan 425 mln soʻm kredit mablagʻlarini boshqa maqsadlarda sarflab, oʻzlashtirganligi aniqlangan.

Shu kabi departamentning Qashqadaryo viloyat boshqarmasi tomonidan oʻtkazilgan tergovga qadar tekshiruvlarda “I.C.H.” xususiy korxonasi rahbari X.K. 11 nafar fuqaroga tadbirkorlik faoliyatini rivojlantirish uchun ajratilgan imtiyozli kredit mablagʻi evaziga taʼminotchi korxona sifatida mahsulotlarni yetkazib bermasdan 348,2 mln soʻmni oʻzlashtirish yoʻli bilan talon-toroj qilganligi aniqlangan.

“Mazkur holatlar yuzasidan Jinoyat kodeksining tegishli moddalari bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.