Foto: oonwoe

AQSHning 45-prezidenti Donald Tramp prezident Jo Baydenning 2024-yilgi prezidentlik poygasidan chiqish haqidagi qaroriga oʻz munosabatini bildiridi. Tramp Baydenni qattiq tanqid qilib, “Bayden mamlakatimiz tarixidagi eng yomon prezident sifatida qoladi” deb yozdi. Bu haqda “Newsweek” nashri CNNʻga tayanib xabar berdi.

Tramp oʻzining “Truth Social” sahifasida ham oʻz qarashlarini davom ettirib, Baydenni prezidentlikka nomzod boʻlishga ham yaramasligini bildirgan. Uning fikricha, demokratlar vakilining prezidentlik davri turli muammolarda oʻtdi.

“Prezidentlik mavqeiga faqat yolgʻon, soxta xabarlar orqali erishgan va yertoʻlasidan chiqmagan”, deb yozgan respublikachilar vakili. Demokratik partiya saylovga sanoqli bir necha oy qolganda yangi nomzod topish muammosi bilan yuzlanib turibdi. Vitse-prezident Kamala Xarris hozircha asosiy nomzod, ammo uni qoʻllovchilar kamchilikni tashkil etishi mumkin.

Tramp boshchiligidagi respublikachilar buni amaldagi maʼmuriyatni tanqid qilish imkoniyati sifatida koʻrmoqda. Trampning nomzod hamkori J.D.Vens ham “Jo Bayden hayotimdagi eng yomon prezident boʻldi” deya izoh berib, Kamala Xarrisni ham amaldagi rahbarning ishlarida teng aybdor ekanligini bildirgan.

Avvalroq, Jo Bayden prezidentlik poygasidan chiqishini maʼlum qilgandi.