Foto: Xalq so‘zi

Samarqand viloyati Oʻsimliklar karantini va himoyasi boshqarmasi tomonidan boshqa mamlakatlardan oʻsimliklarning karantinli va oʻta xavfli zararkunandalari, kasalliklari hamda begona oʻtlar kirib kelishining oldini olish, hudud fitosanitar tozaligini taʼminlash chora-tadbirlari izchil amalga oshirilmoqda. Chunki birgina zararli organizmning urugʻ yoki koʻchat orqali mamlakatga kirib kelishi butun qishloq xoʻjaligini izdan chiqarish mumkin.

Yaqinda ana shunday karantin nazoratlaridan biri Samarqand tashqi iqtisodiy faoliyat maskanida xizmat vazifasini oʻtayotgan inspektorlar tomonidan Samarqand viloyatiga Turkiya davlatidan import qilingan 126 ming 156 dona shaftoli koʻchatlarida oʻtkazildi. Nazorat davomida ushbu import mahsulotlaridan tegishli tartibda namuna olinib, Markaziy fitosanitariya laboratoriyasiga joʻnatildi. Olingan ekspertiza xulosasiga koʻra, Turkiya davlatidan import boʻlgan shaftoli koʻchatlari “Olxoʻri chechagi virusi”- Plum Pox virus (PPV) va «Yashil empoaska» - Empoasca decipiens (tirik) karantin obyektlari bilan zararlangani aniqlandi.

Ushbu karantin osti mahsulotlari Oʻsimliklar karantini va himoyasi agentligi hamda viloyat boshqarmasi, viloyat ekologiya va atrof-muhitni muhofaza qilish boshqarmasi hamda bojxona masʼullaridan iborat ishchi guruhi tomonidan yoqib yuborildi.