Foto: AP

AQSH prezidenti Donald Tramp maʼmuriyati Kongress tomonidan tasdiqlangan xorijiy yordam paketini bekor qilmoqchi, deb yozmoqda “The New York Post”.

“Prezident Tramp Kongress tomonidan tasdiqlangan qariyb 5 milliard dollarlik xorijiy yordam va tinchlikni saqlash operatsiyasini bekor qilmoqchi”, — deyiladi nashrda.

Manbaga koʻra, Oq uy 48-yil davomida qoʻllanilmagan qonunchilik nayrangidan foydalanishni rejalashtirmoqda. U davlat rahbarining Kongressga moliyaviy yil oxirigacha iloji boricha xarajatlarni bekor qilish toʻgʻrisida soʻrov yuborishidan iborat. Natijada, ushbu mablagʻlardan foydalanish muddati qonun chiqaruvchi organ soʻrovga javob bergunga qadar tugaydi.

Qayd etilishicha, mazkur besh milliardga AQSH Xalqaro taraqqiyot agentligi (USAID) orqali yordam koʻrsatish xarajatlari, shuningdek, tinchlikparvarlik faoliyatiga sarflangan mablagʻlar va xalqaro tashkilotlarga badallar kiradi.

Fevral oyi boshida amerikalik tadbirkor, keyinchalik Hukumat samaradorligi departamenti rahbari Ilon Mask Tramp USAIDni yopishga rozi boʻlganini eʼlon qildi. Milliarder agentlikni “oʻlishi kerak boʻlgan jinoiy tashkilot” va “Amerikadan nafratlangan radikal chap qanot marksistlarning ilon uyasi” deb atadi. Trampning oʻzi ham agentlikni amerikalik soliq toʻlovchilar mablagʻlarini AQSH manfaatlariga xizmat qilmaydigan loyihalarga behuda sarflashda, shuningdek, ommaviy axborot vositalariga toʻlash uchun davlat byudjetidan milliardlab dollar oʻgʻirlashda ayblab, bir necha bor tanqid qilgan. U lavozimga kirishgandan soʻng darhol xorijiy yordamni koʻrib chiqish jarayonini boshladi. Oq uy USAIDni Davlat departamenti bilan birlashtirmoqchi ekani xabar qilingandi. Shu bilan birga, OAV xabarlariga koʻra, agentlik insonparvarlik yordami uchun masʼul tuzilma sifatida faoliyatini davom ettiradi.