AQSHning saylangan prezidenti Donald Tramp 25-dekabr, chorshanba kuni Rojdestvo bayramida qilgan murojaatida, agar Kanada Amerikaning 51-shtatiga aylansa, ularning soliqlarini yarmiga kamaytirishga vaʼda berdi.

“Kanada gubernatori Jastin Tryudoni Rojdestvo bayrami bilan tabriklayman. Uning fuqarolari yuqori soliqqa tortib kelinadi, ammo agar Kanada 51-shtat boʻlsa, ularning soliqlari 60 foizdan koʻproq qisqartiriladi, ularning biznesi ikki baravar koʻpayadi va ular dunyodagi boshqa hech qanday davlatda boʻlmagani kabi himoyalangan boʻlar edi”, — deb yozadi u oʻzining “Truth Social” sahifasida.

U xuddi shu narsalar Amerika Qoʻshma Shtatlari milliy xavfsizligi uchun zarur boʻlgan Grenlandiya xalqiga ham tegishli ekanligini taʼkidlagan.

Tramp Kanada bosh vaziri Jastin Tryudo bilan uchrashuvda Ottava noqonuniy migratsiya va giyohvand moddalar kontrabandasi muammosini hal qila olmasa, mamlakat AQSHning 51-shtatiga aylanishi mumkinligini aytgan edi.

26-noyabr kuni AQSHning saylangan prezidenti oʻzining inauguratsiya kuni, agar Ottava va Mexiko Kanada chegarasi orqali noqonuniy migratsiya bilan bogʻliq vaziyatni tubdan oʻzgartira olmasa, ikkala davlatning barcha tovarlariga 25 foizlik import bojlari joriy etishini taʼkidladi.

Bloomberg nashri Tryudo, agar shunday iqtisodiy choralar joriy etilsa, u javob choralarini koʻrishiga vaʼda berganini yozdi. Kanada bosh vaziri mumkin boʻlgan sanksiyalarni Kanada iqtisodiyoti uchun adolatsiz va buzgʻunchi deb hisoblashini maʼlum qilgan.

2023-yilda Qoʻshma Shtatlar Meksika eksportining taxminan 83 foizini va Kanada eksportining 75 foizini tashkil etdi.

Aslini olganda, tariflarni oʻrnatish 2020-yilda Tramp tomonidan muzokara qilingan Qoʻshma Shtatlar-Meksika-Kanada savdo shartnomasini (USMCA) buzish boʻladi.