Toshkent shahrining Mirzo Ulugʻbek va Bektemir tumanlarida kuchli taʼsir etuvchi dori vositalarining noqonuniy savdosi aniqlandi. Bu haqda Bosh prokuratura matbuot xizmati xabar berdi.

Maʼlum qilinishicha, prokuraturaning Mirzo Ulugʻbek va Bektemir tuman boʻlimlari IIB xodimlari bilan hamkorlikda tezkor tadbir oʻtkazib, narkotik moddalarni noqonuniy ravishda sotayotgan ikki fuqaroni qoʻlga olgan. Dorixonadan 161 dona “Zardeks” va 56 dona “Regapen” dori vositalari ashyoviy dalil sifatida olindi.

Shuningdek, yana ikki nafar fuqaro toʻrtta giyohvandlik moddasini sotayotgan vaqtida jinoyat ustida qoʻlga olindi. Mazkur dorixonadan 62 dona kuchli taʼsir etuvchi “Regapen” dori vositasi ashyoviy dalil sifatida olib qoʻyildi. Qolaversa, ular boshqa dorixonada jinoyat ustida ushlangan. Undan 83 dona “Zardeks” va 4 dona “Regapen” dori vositalari ashyoviy dalil sifatida olindi.

Yuqoridagi barcha fuqarolarga nisbatan tegishli moddalar bilan jinoyat ishi qoʻzgʻatildi.