Toshkent shahridagi mehmonxonada kechasi baland ovozda musiqa qoʻyib, atrofdagilarning tinchini buzgan chet el fuqarosi maʼmuriy jazoga tortildi. Bu haqda “Xalq soʻzi”ga poytaxt sudidagi manbasi xabar berdi.

Maʼlum qilinishicha, kecha, 16-may kuni Jinoyat ishlari boʻyicha Chilonzor tuman sudida Maʼmuriy javobgarlik toʻgʻrisidagi kodeksning 183-moddasi (Mayda bezorilik), 192-moddasi (Maishiy shovqinga qarshi kurash talablarini buzish) va 194-moddasining 1-qismida (Ichki ishlar organlari xodimining qonuniy talablarini bajarmaslik) koʻrsatilgan huquqbuzarliklarni sodir etganlikda ayblanayotgan 56 yoshli Isroil fuqarosi A.X.ga nisbatan maʼmuriy ish koʻrib chiqilgan.

Sud hujjatida keltirilishicha, joriy yilning 16-aprel kuni soat 22:30 da “M.” mehmonxonasi xodimi F.A. Toshkent shahar IIBB ishonch telefoniga qoʻngʻiroq qilib, A.X. ismli mijoz fuqarolar tinchini buzayotganini maʼlum qilgan. U arizasida mijoz kechasi baland ovozda musiqa qoʻygani, shuningdek, mast holatda mehmonxonaga peshob qilganini ham qoʻshimchagan.

Holat yuzasidan voqea joyiga IIO xodimlari yetib kelgan hamda A.X.ni IIB boʻlimiga taklif qilishgan. Ammo u IIB boʻlimiga borishdan bosh tortib, ichki ishlar organlari xodimlarining qonuniy talabini bajarmagan.

Sud majlisida ayblanuvchi qilmishiga iqror boʻlgan. 

Sud qarori bilan A.X. Maʼmuriy javobgarlik toʻgʻrisidagi kodeksning 183-moddasi (Mayda bezorilik), 192-moddasi (Maishiy shovqinga qarshi kurash talablarini buzish) va 194-moddasining 1-qismida (Ichki ishlar organlari xodimining qonuniy talablarini bajarmaslik) koʻrsatilgan huquqbuzarliklarni sodir etganlikda aybli deb topilgan. Unga 15 sutka maʼmuriy qamoq jazosi tayinlangan.