Videodan kadr

Toshkent shahri Yakkasaroy tumanidagi texnopark hududida yirik yongʻin sodir boʻldi. Favqulodda vaziyatlar vazirligi axborot xizmati hodisa yuzasidan maʼlumot berdi.

Qayd etilishicha, bugun, 1-may kuni soat 07:01 da poytaxtning Yakkasaroy tumani Qoʻshbegi koʻchasida joylashgan Yakkasaroy kichik sanoat zonasi hududidagi sintepon ishlab chiqarish sexida yongʻin roʻy berganligi toʻgʻrisida FVBga xabar kelib tushgan.

Shunga koʻra, yongʻin -qutqaruv ekipajlari soat 07:04 da hodisa joyiga yetib borib, yongʻin 07:45 da oʻrab olingan va soat 08:09 da oʻchirilgan.

Alanga bartaraf etilgandan soʻng, voqea joyini oʻrganish davomida ikki nafar fuqaroning jasadi aniqlangan. Shuningdek, 5 nafar fuqaro tan jarohati bilan shifoxonaga yuborilgan.

“Yongʻin ishlab chiqarishda texnologik jarayonni buzilishi natijasida yuzaga kelganligi taxmin qilinmoqda”, deyiladi vazirlik xabarida.

Bildirilishicha, yongʻinni bartaraf etishga 11 ta asosiy, 6 ta maxsus turdagi yongʻin oʻchirish texnikalari jalb etilgan. Voqea joyiga FVV rahbariyati, Toshkent shahar FVB boshligʻi va tuman FVB rahbar xodimlari, IIB, SSB hamda prokuratura masʼul xodimlari chiqqan.

Hodisa oqibatida sexning taxminan 700 kv.m maydonda — tomi, shifti va mahsulotlari yonib zararlangan. Hozirda mazkur holat yuzasidan dastlabki tergov oldi surishtiruv ishlari olib borilmoqda.