Foto: DXX

Toshkent shahrida oʻzini Davlat xavfsizlik xizmati xodimi deb tanishtirgan firibgar shaxs ushlandi. Bu haqda DXX xabar berdi.

Maʼlum qilinishicha, poytaxtda oʻtkazilgan tezkor tadbirda Namangan shahrida yashovchi 40 yoshli fuqaro oʻzini goʻyoki DXX xodimi deya tanishtirib, Namangan viloyatida roʻyxatdan oʻtgan xususiy korxona nomiga olib kelingan tovarlarni Bojxona qoʻmitasining Shaxsiy xavfsizlik boshqarmasida ishlovchi tanishlari orqali hech qanday muammosiz bojxona nazorati va rasmiylashtiruvidan oʻtkazdirib berishini aytgan.

DXX va bojxona idoralari hamkorligida oʻtkazilgan tezkor tadbirda, ushbu hojatbaror fuqaro korxona rahbaridan firibgarlik yoʻli bilan har bir yuk partiyasi uchun 500 dollardan jami ming dollar miqdoridagi pul mablagʻlarini olgan vaqtida ushlangan.

Aniqlanishicha, mazkur shaxs korxonaga xorijdan import qilinayotgan avtomobil ehtiyot qismlarini bojxona rasmiylashtiruvidan tezlashtirib chiqarib berayotganligini aytib, korxona rahbaridan muqaddam ming dollar olgan.

Hozirda unga nisbatan jinoyat ishi qoʻzgʻatilib, tergov harakatlari olib borilmoqda.