Toshkent xalqaro investitsiya forumi doirasida Oʻzbekiston va AQSH ishbilarmon doiralari ishtirokida yirik biznes-forum tashkil etildi. Mazkur tadbirda Oliy Majlis Senati Raisining birinchi oʻrinbosari Sodiq Safoyev ham qatnashdi. Forum Oʻzbekiston Investitsiyalar, sanoat va savdo vazirligi hamda Amerika-Oʻzbekiston savdo palatasi hamkorligida oʻtkazildi.

Tadbirda ikki davlatning ishbilarmon va davlat sektori vakillaridan iborat 150 dan ortiq ishtirokchilar qatnashdi. Ular orasida sanoat, raqamlashtirish, qishloq xoʻjaligi, energetika, moliya va sogʻliqni saqlash kabi muhim tarmoqlarda faoliyat yuritayotgan 100 ga yaqin yetakchi kompaniyalar vakillari ham bor edi.

Forum dasturidan Oʻzbekistonning sarmoyaviy salohiyati taqdimoti hamda G2B — yaʼni davlat va biznes vakillari oʻrtasidagi ikki tomonlama uchrashuvlar oʻrin oldi. Unda ishtirokchilar savdo-iqtisodiy aloqalarni yanada kengaytirish, qoʻshma loyihalarni amalga oshirish va institutsional hamkorlikni chuqurlashtirish imkoniyatlarini muhokama qildilar.

Sodiq Safoyev forumda chiqish qilib, Oʻzbekistonda amalga oshirilayotgan keng koʻlamli islohotlar natijasida jamiyat yangilanib borayotgani va mamlakatimiz siyosiy hamda iqtisodiy modernizatsiya yoʻlidan dadil bormoqda ekanini taʼkidladi. U, shuningdek, bu kabi forumlar strategik sheriklikni mustahkamlashda muhim oʻrin tutishini qayd etdi.

Oʻzbekiston–AQSH biznes-forumi ikki davlat oʻrtasidagi oʻzaro manfaatli hamkorlikni mustahkamlash yoʻlidagi navbatdagi muhim qadamlardan biri boʻlib, Oʻzbekistonning AQSH uchun Markaziy Osiyodagi ishonchli iqtisodiy va sarmoyaviy hamkor maqomini yana bir bor tasdiqladi.