Ijtimoiy tarmoqlarda Toshkent shahrida erkak kishi ayolga kuch ishlatgani aks etgan video tarqalib, turli munosabatlarga sabab boʻldi. Ushbu holat yuzasidan poytaxt Ichki ishlar bosh boshqarmasi maʼlumot berdi.

Maʼlum qilinishicha, joriy yilning 22-iyul kuni taxminan soat 13.30 larda Mirobod tumani, Qoʻyliq-1 dahasi hududidagi koʻp qavatli uylar oldida 1993-yilda tugʻilgan S.A. oʻzaro kelishmovchilik oqibatida oldindan tanishi boʻlgan 1999-yilda tugʻilgan T.K. ga nisbatan kuch ishlatib, jamiyatda yurish-turish qoidalarini qasddan mensimasdan jamoat tartibini buzgan.

Shunga qaramasdan, jabrlanuvchi ayol ichki ishlar organlariga yoki shifoxonaga murojaat qilmagan.

Mazkur holat yuzasidan Mirobod tumani IIO FMB tomonidan Oʻzbekiston Respublikasi Maʼmuriy javobgarlik toʻgʻrisidagi kodeksining 183-moddasi (“Mayda bezorilik”) va 194-moddasi (“Ichki ishlar organlari xodimining qonuniy talablarini bajarmaslik”) alomatlari bilan maʼmuriy bayonnoma rasmiylashtirilib, qonuniy chora koʻrish uchun Jinoyat ishlari boʻyicha Mirobod tuman sudiga yuborilgan. Sud tomonidan S.A. ga nisbatan 15 sutka maʼmuriy qamoq jazosi tayinlangan.

Avvalroq Ijtimoiy tarmoqlarda Angren shahrida voyaga yetmagan 14 yoshli qiz 4 nafar yigit tomonidan zoʻrlangani mazmunidagi xabarlar tarqalgani hamda ushbu holat yuzasidan Bolalar ombudsmani maʼlumot bergani toʻgʻrisida xabar qilgandik.