Illyustrativ foto

Toshkent viloyatida faoliyat yurituvchi “Lutfilla fayz” MCHJ spirtli ichimliklar reklamasini joylashtirilgani uchun moliyaviy jarimaga tortildi. Bu haqda Raqobat qoʻmitasi xabar qildi.

Qayd etilishicha, Raqobat qoʻmitasining Toshkent viloyati hududiy boshqarmasi tomonidan ommaviy axborot vositalari, internet tarmoqlarida hamda tashqi reklama vositalarida joylashtirilgan reklama materiallarining reklama toʻgʻrisidagi qonunchilikka mosligi yuzasidan oʻrganish ishlari olib borilgan.

Buning natijasida, Toshkent viloyatida faoliyat olib boruvchi “Lutfilla fayz” MCHJ tomonidan alkogol vositalari reklamasini qoʻyish holatlari aniqlandi va Maxsus komissiya tomonidan korxonaga nisbatan moliyaviy jarima qoʻllash haqida qaror qabul qilindi.

“Qonunbuzilish holatini bartaraf etish va kelgusida yoʻl qoʻymaslik yuzasidan koʻrsatma berildi”, deyiladi xabarda.

Taʼkidlash joiz, “Reklama toʻgʻrisida”gi Qonunning 38-moddasiga asosan, har qanday quvvatdagi alkogol mahsulotlarining reklamasiga yoʻl qoʻyilmasligi belgilab qoʻyilgan.

Avvalroq Qashqadaryo viloyati Koson tumanida katta miqdorda yaroqsiz alkogol mahsulotlari savdosining oldi olingani haqida xabar qilgandik.