“Toshkent” xalqaro aeroportida mamlakatimiz bosh havo bandargohi orqali sayyohlarni ham qabul qilish, ham joʻnatish bilan shugʻullanuvchi turoperatorlar vakillari uchun infotur boʻlib oʻtdi.

Tadbirdan koʻzlangan maqsad xorijiy va mahalliy sayyohlar uchun yaratilayotgan shart-sharoitlar, yangilanayotgan aeroport infratuzilmasi, yangi savdo shoxobchalari, umumiy ovqatlanish va xizmat koʻrsatish nuqtalari, yuqori qulaylikdagi zallar, aeroportning qoʻshimcha xizmatlari xaqida maʼlumot berish, shuningdek, turizm sanoati vakillarining fikr-mulohazalarini olishdan iborat edi.

“Uzbekistan Airports” xodimlari xalqaro aviaqatnovlar terminalining uchib kelish va uchib ketish zallari boʻylab ekskursiya oʻtkazib, turoperatorlarning barcha savollariga javob berishdi.

Shuningdek, tadbir doirasida mehmonlar mahalliy “Silk Avia” aviakompaniyasi samolyoti bortiga chiqishdi, unda turli boʻlimlar rahbarlari aviatashuvchining faoliyati haqida batafsil soʻzlab berishdi.

Tadbir yakunida davra suhbati boʻlib, unda sayyohlik kompaniyalari va aeroport vakillari oʻzaro fikr almashib, hamkorlikni yanada rivojlantirish istagini bildirdilar.