Illyustrativ foto

Afgʻonistonda “Tolibon” harakati hukmronligiga hali bir oy boʻlmasdan mamlakatning 20 viloyatida 153 ta OAV oʻz faoliyatini toʻxtatgan.

Bu haqda "Tolo News" Afgʻonistondagi erkin matbuotni qoʻllab-quvvatlovchi manbalarga tayanib xabar bermoqda. 

«Yopilgan 153 ommaviy axborot vositalari orasida radiostansiyalar, bosma nashrlar va telekanallar bor. Ularning faoliyatini toʻxtatishga OAVga qoʻyilgan cheklovlar, shuningdek, moliyaviy muammolar sabab boʻlgan. Jurnalistlar Afgʻonistonning 20 viloyatida ishsiz qolmoqda», deyiladi manbada.

“Bu tendensiyaning davom etishi xavotirlarni keltirib chiqaradi. Biz xalqaro tashkilotlarni bu muammoni hal qilish uchun zudlik bilan choralar koʻrishga chaqiramiz. Aks holda, matbuot erkinligi va boshqa fuqarolik erkinliklari tez orada tugaydi”, deydi Afgʻoniston Milliy jurnalistlar uyushmasi vakili Masrur Lutfiy. U “Tolibon” davrida afgʻonlarning hayotini matbuotsiz bashorat qilmoqda.

Joriy yilning 15-avgust kuni “Tolibon” harakati Kobulni egallashi bilan butun Afgʻonistonda oʻz hukmronligini oʻrnatganini eʼlon qildi. Yaqinda esa “Tolibon” oʻzining muvaqqat hukumatini tuzganini bildirdi.