Arxiv foto

Bugun, 29-iyul kuni mamlakatimiz oliy taʼlim muassasalariga qabul test imtihonlari boshlandi.

Poytaxtimizdagi Ekspomarkaz milliy koʻrgazmalar majmuasi pavilyonlarida oʻtayotgan jarayonlarni kuzatdik.

Abituriyentlar test varaqlaridan bosh koʻtarmaydi. Kuzatuvchilar ularning har bir harakatini nazorat qilib bormoqda.

Bizning eʼtiborni tortgan jihat: koʻpchilik abituriyentlarning imtihon boshlanganiga oʻtar-oʻtmas test javoblarini topshirib, pavilyondan chiqib ketayotgani boʻldi.

Hayron qoldik: abituriyentlar shunchalik bilimli boʻlib ketishganmi yoki savollar shu qadar osonlashtirilganmi?

- Nizomiy nomidagi pedagogika institutining mehnat taʼlimi fakultetiga hujjat topshirganman, - deydi yangiyoʻllik Shoira Abdurahmonova. - Imtihon koʻnglimdagidek oʻtdi. Barcha savollarni yechib chiqyapman. Koʻpchiligi tanish savollar. Oʻtgan yili ham topshirgandim. Lekin omadim kelmagan. Toʻgʻri, javoblarni tavakkal qilib ham belgiladim. Muhimi, bilgan savollarim ham tushdi. Bu yil talabalikdan umidim bor.

Darvoqe, fotomuxbirlarga mutasaddilar tomonidan imtihon jarayonlarini suratga olishga imkon berilmadi. Nizomga koʻra, soat 10:00 dan 10:20 gacha ruxsat etilar ekan. Ammo gurras-gurras tashqariga otlanayotgan abituriyentlardan bu vaqtga kelib pavilyonlar boʻshab qolishi aniq...