Videodan kadr

Termiz shahrining Farovon massivida 41 yoshli erkak oʻzini koʻp qavatli uyning 6-qavatdan tashlab, halok boʻldi. «Xalq soʻzi«ga bu haqda Bosh prokuratura matbuot kotibi Hayot Shamsutdinov xabar berdi.

Bildirilishicha, Termiz shahar IIB navbatchilik qismining bugun, 18-mart kuni soat 12:00 lardagi xabariga koʻra, 41 yoshli K.J. Termiz shahri “Bogʻishamol” MFYda joylashgan 7 qavatli uyning 6-qavatidan oʻzini tashlab, joniga qasd qilgan.

Hodisa joyiga Termiz shahar prokurori R.Ibragimov, prokuratura tergovchisi O.Absamatov, IIB boshligʻi M.Boltayev va boshqa tezkor tergov guruhi aʼzolari yetib borgan. Fuqaro yashagan xonadondan 6 dona 1,5 litrli pivo spirtli ichimligi, K.J.ga tegishli ekanligi gumon qilingan 1 dona telefon hujjatlashtirib olingan.

Respublika sud-tibbiy ekspertiza ilmiy-amaliy markazi Surxondaryo filialining dastlabki murda xulosasiga koʻra, K.J.ning oʻlimiga “bel va umurtqa suyaklarining sinishi, ichki aʼzolarining ezilishi” sabab boʻlgani koʻrsatilgan.

Hozirda mazkur holat yuzasidan Termiz shahar prokuraturasi tomonidan tergovga qadar tekshiruv oʻtkazilmoqda.