2025-yil 2-iyun kuni Oʻzbekiston Respublikasi Oliy Majlisi Senati Raisi Tanzila Narbayeva Rossiya Federatsiyasining Oʻzbekistondagi Favqulodda va Muxtor elchisi Oleg Malginov bilan uchrashuv oʻtkazdi. Bu haqda Senat matbuot xizmati xabar berdi.

Uchrashuv chogʻida elchining Oʻzbekistondagi diplomatik faoliyati sarhisob qilinib, uning soʻnggi toʻrt yil davomida ikki mamlakat oʻrtasidagi doʻstona aloqalarni mustahkamlashdagi hissasi alohida eʼtirof etildi.

Muloqot davomida parlamentlararo hamkorlik, shu jumladan xalqaro parlament tuzilmalari doirasidagi aloqalarni yanada rivojlantirish masalalari muhokama qilindi.

Ikki davlat rahbarlarining siyosiy irodasi Oʻzbekiston va Rossiya oʻrtasidagi munosabatlarni chuqurlashtirishda muhim omil boʻlib xizmat qilayotgani taʼkidlandi. Shuningdek, parlamentlar oʻzaro muloqotni kuchaytirishda tobora muhim rol oʻynayotgani qayd etildi.

Uchrashuv yakunida tomonlar Oʻzbekiston va Rossiya xalqlarining manfaatlari yoʻlida konstruktiv va oʻzaro manfaatli hamkorlikni izchil davom ettirish borasida kelishib oldilar. Mazkur uchrashuv ikki davlat oʻrtasidagi strategik sheriklikni yanada mustahkamlashga xizmat qilishi kutilmoqda.