Foto: Madaniyat vazirligi

Oʻzbek sanʼatining fidoyilaridan biri, mohir aktyor, rejissyor, hajviy qoʻshiqlar va soʻz ustasi — Sherqoʻzi Gʻoziyev 75 yoshida vafot etdi. Bu haqda Madaniyat vazirligi xabar berdi.

Sherqoʻzi Gʻoziyev 1950-yilning 8-may kuni Fargʻona viloyati Buvayda tumani Chirkay qishlogʻida tavallud topgan. U 1970-yildan “Teleminiatyuralar teatri”da rollar ijro etishni boshlaydi. Ostrovskiy nomidagi Toshkent teatr va rassomlik sanʼati institutining aktyorlik boʻlimiga sirtdan oʻqishga kirib, 1976-yili muvaffaqiyatli tugatadi.

Gʻoziyev faoliyati davomida “Ekran xandasi”, “Shanba nonushtadan soʻng” koʻrsatuvlari hamda “Changalzor qiroli” filmi, “Nashtar” kinojurnallarida rollar ijro etgan. Shuningdek, 1990-yilda “Qalbim navolari” deb nomlangan sheʼrlar toʻplam kitobi nashr etilgan.

Shu bilan birga u rejissyorlikda ham oʻzini sinab koʻrgan. “Sherxan” nomli studiya ochib, hindlar bilan hamkorlikda 2006-yilda “Sherxan traktorchi” kinokomediyasini, 2008-yilda “Yolgʻiz emassan” melodrama filmlarini tasvirga oldi.

Sherqoʻzi Gʻoziyev xalqimiz qalbida samimiyligi, insoniy fazilatlari, sadoqati va ijodiy jonkuyarligi bilan mangu yashab qoladi.

“Xalq soʻzi” – “Narodnoye slovo” gazetalari tahririyati ijodiy jamoasi marhumning oilasi va yaqinlariga taʼziya bildiradi.