Okean ortida yana bir marra zabt etildi. Bugun dunyo ahli bizni sport orqali yaqindan tanimoqda, tan olmoqda, desak mubolagʻa boʻlmaydi. Sportchilarimiz erishayotgan yutuqlar esa manaman degan davlatlarning havasini keltirmoqda.

AQSHning Nyu-York shahrida sportning taekvondo ITF turi boʻyicha 16 marotaba nufuzli “Big Epl” xalqaro turniri oʻtkazildi. Unda musobaqa mezbonlari Amerika Qoʻshma shtatlari, Kanada, Kosta-Rika, Dominikan Respublikasi, Meksika, Gonduras, Argentina va Oʻzbekiston kabi taekvondoning ITF yoʻnalishi ancha rivojlangan davlatlardan sportchilar ishtirok etishdi.

Musobaqada sportchilar taekvondo ITFning 3 yoʻnalishi boʻyicha gʻoliblik uchun kurash olib bordilar.

Mazkur nufuzli musobaqada Vatanimiz bayrogʻini sarbaland koʻtarilishiga, madhiyamiz jarang sochishiga sportchilar O. Jalilov va A. Hamidullayevlar sababchi boʻldi.

Jumladan, musobaqaning tul bahslarida Hamidullayev Abdujabbor oltin medalga sazovor boʻldi. Jalilov Oybek esa kumush medal sohibiga aylandi. Shuningdek, O.Jalilov - 90 kg. vazn toifasida massogi bahslarida ham yana bitta kumush medalni oʻz hisobiga qoʻshib qoʻydi.

Shu tariqa vakillarimiz Toshkentga 1 ta oltin, 2 ta kumush, jami 3 ta medal bilan qaytishadigan boʻldi.