Namangan viloyati markazidagi “Maʼrifat maskani”da oʻtkazilgan mazkur biznes va investitsiya anjumanida 300 nafardan ziyod ishbilarmonlik doirasi vakillari qatnashdi. Kun tartibi avvalida maskan foyesida mahalliy tadbirkorlar tomonidan ishlab chiqarilayotgan mahsulotlar koʻrgazmasi namoyish qilindi.

Iqtisodiyot va moliya vazirligi, “Tadbirkorlikni rivojlantirish kompaniyasi” aksiyadorlik jamiyati, Savdo-sanoat palatasi tashabbusi bilan Namangan viloyati hokimligi hamkorligida tashkil etilgan forumda mamlakatimiz iqtisodiyotining turli yoʻnalishlarida faoliyat yuritayotgan yetakchi mutaxassislar tadbirkorlar va yoshlar bilan uchrashib, oʻz bilim va tajribalarini ulashdi.

— Bugungi kunimiz kutilganidan ham samarali oʻtdi, — deydi Toʻraqoʻrgʻon tumanidagi “Dilrabo SDA” koʻp tarmoqli savdo va ishlab chiqarish korxonasi rahbari Maʼsuda Sodiqova. — Xususan, “Tadbirkorlikni rivojlantirish kompaniyasi” AJ direktori Abbosxon Mahamatov, “Millat umidi” universiteti va maktabi asoschisi Umidjon Ishmuhamedov, investitsiya boʻyicha xalqaro ekspert Tamilla Kurbanova va boshqa bir qator spikerlar bilan ochiq muloqot ishtirokchilarga sohadagi ilgʻor tajriba va yangiliklarni bilib olish, muvaffaqiyatli biznes yuritish borasidagi tushunchalarni mustahkamlash imkonini berdi.

Forum ishtirokchilari faoliyatga investitsiyalarni jalb etish, innovatsion loyihalarni amalga oshirish va xalqaro bozorga chiqish masalalari yuzasidan oʻzaro tajriba almashdi.

Qudratilla NAJMIDDINOV,

“Xalq soʻzi”.