Foto: Prokuratura departamenti

Surxondaryo va Fargʻona viloyatlarida yer maydonlarini sotmoqchi boʻlgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentining Denov tumani boʻlimi, DXX va IIB xodimlari hamkorligida tezkor tadbir oʻtkazilgan. Unda fuqaro M.N. va kadastrlar palatasi Oltinsoy tuman boʻlimi muhandisi A.N. oʻzaro til biriktirgani hamda fuqaro A.Y.ning ishonchiga kirib, unga Oltinsoy tumani “Ipoq” MFY hududidagi davlat zaxirasidagi 65 sotix yer maydonini 1,1 mlrd soʻmga sotishga kelishib, shundan 300 mln soʻmini olgan vaqtida ashyoviy dalillar bilan ushlangan.

Departamentning Bagʻdod tumani boʻlimi, DXX va IIB xodimlari hamkorligida oʻtkazilgan tezkor tadbirda esa “Sh-B.” fermer xoʻjaligi ishchisi Sh.Yu. fuqaro F.B.ning ishonchiga kirib, unga ushbu fermer xoʻjaligiga qarashli 26 sotix hamda tutash hududdagi suv yetkazib berish xizmatiga qarashli muhofaza zonasidagi 14 sotix yer maydonini 60 ming dollarga sotishga kelishib, oldindan 35 ming dollarini olgan vaqtida ashyoviy dalillar bilan qoʻlga olingan.

Hozirda mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.