Surxondaryo viloyati Shoʻrchi tumanida “Damas” rusumli avtomashina piyodalar yoʻlagidan oʻtayotgan 3 kishini urib ketdi. Mazkur holat yuzasidan viloyat Yoʻl harakati xavfsizligi boshqarmasi maʼlumot berdi.

Qayd etilishicha, voqea joriy yilning 22-sentyabr kuni soat 14:00 da Shoʻrchi tumani Navroʻz mahallasi hududidan oʻtuvchi 4K 592 avtomobil yoʻlining 2-kilometrida sodir boʻlgan.

Oʻsha kuni 27 yoshli haydovchi “Damas” avtomashinasini boshqarib ketayotganida rul boshqaruv qurilmasida nosozlik yuzaga kelgan. Oqibatda mashina yoʻlning qarama-qarshi tomoniga chiqib ketgan va tartibga solinmagan piyodalar oʻtish joyida turgan 3 nafar piyodani urib yuborgan.

Piyodalar ushbu YTH tufayli olgan tan jarohatlari bilan tuman tibbiyot birlashmasiga yetkazilgan.

Hozirda holat yuzasidan Shoʻrchi tumani IIB tomonidan yoʻl-transport hodisasi oqibatida olgan tan jarohatining ogʻirlik darajasini, hamda transport vositasining texnik holatini aniqlash maqsadida sudga oid tibbiy va texnik ekspertiza tayinlanib, tergovga qadar surishtiruv harakatlari olib borilmoqda.