Istanbul shahar hokimiyatiga qarshi olib borilgan “korrupsiya va terror” tergovida hibsga olish talabi bilan jinoiy sudga yuborilgan Istanbul shahar hokimi Akrom Imomoʻgʻli hibsga olindi, deb xabar bermoqda “CNN Turk” nashri.

Maʼlum qilinishicha, Istanbul prokuraturasi tomonidan Akrom Imomoʻgʻli va 99 gumonlanuvchiga nisbatan “jinoiy tashkilot yetakchisi boʻlish”, “jinoiy tashkilotga aʼzo boʻlish”, “tovlamachilik”, “pora olish”, “ogʻirlashtirilgan firibgarlik” hamda “tenderni soxtalashtirish” kabi jinoyatlarni sodir etganlikda gumonlanib, tergov ishlari olib borilmoqda.

Anqara hokimi, Imomoʻgʻlining partiyadoshi Mansur Yavash vaziyatga munosabat bildirar ekan, bu qaror Turkiya sud tizimi uchun sharmandalik ekanligini taʼkidlagan.

Eslatib oʻtamiz, avvalroq, Istanbul universiteti Akrom Imomoʻgʻlining diplomini bekor qilgan edi. Shu sababli siyosatchi prezidentlikka nomzodini qoʻya olmaydi. U amaldagi prezident Erdogʻanning asosiy raqibi sifatida tanilgan.

“Biz buyuk zulmga duch keldik. Ammo men taslim boʻlmasligimni bilishingizni istayman. Men barchangizni juda yaxshi koʻraman, millatga ishonaman”, — degandi Imomoʻgʻli.