Foto: “Xalq soʻzi”

“Oʻzbekiston Respublikasi Prezidenti huzuridagi Strategik islohotlar agentligi faoliyatini yanada takomillashtirish chora-tadbirlari toʻgʻrisida”gi Prezident Farmoni (PF–180-son, 08.11.2023-y.) qabul qilindi.

Farmon bilan Strategik islohotlar agentligining qoʻshimcha vazifalari belgilandi. Shunga koʻra, Agentlik:

— aholini tashvishga solayotgan masalalar va muammolarga yechim topish hamda ijtimoiy soha, iqtisodiyot va boshqa ahamiyatga ega boʻlgan yoʻnalishlarni transformatsiya qilish boʻyicha istiqbolli tashabbuslarni ishlab chiqadi;

— ijtimoiy soha, iqtisodiyot va boshqa ahamiyatga ega yoʻnalishlarda xorij mamlakatlarida amalga oshirilayotgan islohotlar va ilgari surilayotgan tashabbuslarni (shu jumladan, xorijiy davlatlar rahbarlarining chiqishlari va nutqlarini) oʻrganishni tashkil qilib, ularni Oʻzbekiston sharoitida implementatsiya qilish boʻyicha takliflar ishlab chiqadi;

— xalqaro tashkilotlar va moliya institutlari, konsalting kompaniyalari, yetakchi xorijiy ilmiy-tadqiqot va ekspert muassasalari hamda mutaxassislarning tavsiyalarini tahlil qilish va umumlashtirish, maqbul tashabbuslarni implementatsiya qilish boʻyicha takliflar tayyorlaydi;

— istiqbolli tashabbuslarni ishlab chiqish yuzasidan respublikaning ilmiy tashkilotlari bilan hamkorlik qiladi.

Respublika ijro etuvchi hokimiyat organlari har oyda jalb qilingan xorijiy ekspertlar, konsultantlar va maslahatchilar tomonidan bajarilgan ishlar toʻgʻrisida batafsil maʼlumotni Strategik islohotlar agentligiga taqdim qilib boradi.