Bugun O‘zbekiston xalqaro islomshunoslik akademiyasida “Sport – tinchlik elchisi” shiori ostida “Imom Moturidiy kubogi” sport musobaqalarining tantanali ochilish marosimi bo‘lib o‘tdi. Respublikamizda tahsil olayotgan barcha diniy muassasa talabalarini o‘zida to‘plagan ushbu tadbirda O‘zbekiston Milliy Olimpiya qo‘mitasi rahbariyati ham ishtirok etdi.

Marosimda so‘z olgan rasmiylar oliy va diniy ta’lim muassasalari o‘rtasida sportni ommalashtirish, talabalarni sog‘lom turmush tarzi va jismoniy faollikka jalb qilish, ta’lim muassasalari o‘rtasida sportni targ‘ib qilish orqali do‘stona aloqalarni mustahkamlash muhim ahamiyat kasb etishini ta’kidlashdi.

Musobaqa doirasida yoshlar mini-futbol, voleybol, stol tennisi, shaxmat va shashka, kibersport, kurash, arqon tortish, tosh ko‘tarish kabi turlar bo‘yicha bellashishmoqda.

Shuningdek, sport sohasidagi o‘zaro hamkorlikni davom ettirish va uni yangi bosqichga olib chiqish maqsadida Sport vazirligi, Milliy Olimpiya qo‘mitasi, Milliy Paralimpiya qo‘mitasi, Xalqaro islomshunoslik akademiyasi o‘rtasida hamkorlik memorandumlari imzolandi.