“Oʻzsanoatqurilishmateriallari” uyushmasi matbuot xizmati tomonidan berilgan maʼlumotlarga koʻra, joriy yilning toʻqqiz oyida Oʻzbekistondagi tarmoq korxonalari tomonidan 287,8 mln. AQSH dollarlik qurilish materiallari va xizmatlari eksporti amalga oshirildi. Bu 2020-yilning shu davridagiga nisbatan 84 mln. dollarga koʻpdir.

Aksariyat qurilish materiallari boʻyicha tarmoqda yangi quvvatlar ishga tushirilishi va modernizatsiya qilinishi, investitsiya loyihalarining amalga oshirilishi hamda yangi korxonalar eksportga jalb qilinishi hisobiga baʼzi turdagi qurilish materiallari eksporti bir necha barobarga oshgan. Misol uchun, 2020-yilga nisbatan keramik plitkalar 2,6 barobar, gulqogʻoz 2,2 barobar, tabiiy pardozbop toshlar 5,6 barobar, oyna mahsulotlari 2,6 barobar koʻp xorij bozorlariga sotilgan.

Joriy yilning oʻtgan davrida qurilish materiallari eksporti geografiyasi anʼanaviy hisoblangan bozorlar, yaʼni Qozogʻiston, Tojikiston, Qirgʻiziston, Turkmanistondan tashqari Afgʻoniston, Rossiya, Litva, Turkiya, Ukraina, Ozarbayjon, Xitoy va Eron davlatlari hisobiga kengaygan.