Bosh prokuror oʻrinbosari Sh.Toʻxtaboyev boshchiligidagi ishchi guruh tomonidan Sirdaryoda oʻzan tozalash ishlarini olib borish  natijasida yuzaga kelayotgan muammolar oʻrganildi.

Maʼlumot uchun, viloyatning Guliston, Sayxunobod va Sirdaryo tumanlari hududidan Sirdaryo daryosi oqib oʻtadigan qismining umumiy uzunligi 140,7 km.ni tashkil etib, Sirdaryo daryosining umumiy suv muhofaza maydoni 7 003,1 gektarni, shundan qirgʻoq boʻyi maydoni 1 388,8 gektarni tashkil qiladi.

Mazkur hududda oʻzan tozalashga 37 ta tadbirkorlik subyektlari va Muhandislik muhofaza va qurilish-tiklash ishlari bosh boshqarmasi jalb qilinib, “Xavfsiz daryo” DUK bilan 3 yil muddatga tuzilgan shartnomalar asosida 46 ta uchastkada jami 49,2 km. masofada oʻzan tozalash ishlari olib borilmoqda. 

Oʻrganishda 30 ta tadbirkorlik subyektlarida daryodan qum qazib olish jarayonida hosil boʻladigan oqova suvlar tindirilmasdan  toʻgʼridan-toʻgʼri  daryoga tashlanayotganligi, 9 tasida yerlar neft mahsulotlari va chiqindilar bilan ifloslantirilayotganligi  aniqlandi.

Shuningdek, 16  ta subyektning uchastkalarida  oʻtkazilgan topografik tasvirlash ishlari natijasida 11 417 m3 qirgʻoq yemirilganligi va noqonuniy noruda material (qum-shagʼal) qazib olinganligi maʼlum boʻldi.

Qolaversa, mazkur hududdan oʻtgan davlat ahamiyatidagi 4P-26 avtomobil yoʻli orqali Sirdaryo daryosi oʻzanida joylashgan uchastkalardan sigʻimi 40  tonna va 60 tonna yuk avtomobillarining yillar davomida muntazam  qatnashi natijasida yoʻl qoplamasi toʻliq buzilib, yaroqsiz holga kelib qolgan.

Hozirda mazkur yoʻnalishda nazorat tadbirlari davom ettirilib, daryo oʻzanini tozalash ishlari bilan shugʻullanuvchi subyektlarda oʻrganishlar olib borilmoqda.