Sirdaryoda Xitoy texnologiyasi asosida paxta yetishtirish ommalashmoqda

13:03 01 May 2024 Iqtisodiyot
264 0

Foto: “Xalq soʻzi”

Ahmadali SHERNAZAROV/«Xalq soʻzi». Joriy yilda Sirdaryo viloyati boʻyicha jami 3 ming gektar maydonga Xitoy texnologiyasi asosida chigit ekildi. Oʻtgan yili Sirdaryo tumanida 406 gektar maydonda tajriba tariqasida ayni usulda plyonka ostiga chigit ekilgan edi.

Mazkur agrotexnologiyaning oʻziga xosligi shundaki, chigit ekish, plyonka toʻshash va tomchilatib sugʻorish uchun shlang yotqizish ishlari zamonaviy texnika yordamida bir vaqtning oʻzida amalga oshiriladi. Bu esa fermerlar uchun sezilarli darajadagi vaqt va mablagʻni tejash imkonini beradi. Chigit yerga tushgandan 5-6 kundan soʻng, anʼanaviy usullar bilan taqqoslaganda esa taxminan besh kun oldin unib chiqadi. Hosildorlik 50 sentnerdan ortadi. Ayni paytda viloyatda ushbu texnologiya qoʻllanilayotgan maydonlarda chigit toʻliq unib chiqib, rivojlanmoqda.

— Viloyatda yil sayin suv tejamkor, hosil tannarxini arzonlashtirish va daromadni koʻpaytirishga xizmat qiluvchi texnologiyalardan foydalanish koʻlami kengayib bormoqda, — deydi Sirdaryo viloyati hokimi oʻrinbosari vazifasini bajaruvchisi Ulugʻbek Hakimov. — Xususan, joriy yilda tomchilatib sugʻoriladigan gʻoʻza maydonlari 6500 gektarga yetdi. Kelgusi yilda Xitoy texnologiyasida paxta yetishtiriladigan ekin maydonlari 10 ming gektarga yetkaziladi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Ko‘p o‘qilganlar

Yangiliklar taqvimi

Кластер