Oʻzbekiston Respublikasi Prezidenti Shavkat Mirziyoyev 22-sentyabr kuni Turkmaniston Prezidenti Serdar Berdimuhamedov bilan telefon orqali muloqot qildi.

Davlatimiz rahbari Turkmaniston Prezidentini tavallud kuni bilan samimiy tabriklab, unga mustahkam sogʻlik va baxt-saodat, qardosh turkman xalqiga tinchlik-osoyishtalik va ravnaq tiladi.

Oʻzbekiston bilan Turkmaniston oʻrtasidagi doʻstlik, yaxshi qoʻshnichilik va strategik sheriklik munosabatlarini yanada rivojlantirish va mustahkamlashning dolzarb masalalari koʻrib chiqildi.

Faol siyosiy muloqot va samarali idoralararo aloqalar yoʻlga qoʻyilgani katta mamnuniyat bilan qayd etildi.

Tovar ayirboshlashni koʻpaytirish, sanoat va energetikada kooperatsiya loyihalarini ilgari surish masalalariga alohida eʼtibor qaratildi. “Shovot-Toshovuz” savdo zonasi qurilishi yakunlanmoqda. Oʻzbekistonda Hududlar forumi, koʻrgazma, Turkmaniston madaniyati va kinosi kunlarini oʻtkazish rejalashtirilgan.

Mintaqaviy kun tartibining dolzarb masalalari va boʻlajak oliy darajadagi tadbirlar rejasi ham koʻrib chiqildi.

Muloqot soʻngida davlatimiz rahbari Turkmaniston Prezidenti va xalqini yaqinlashib kelayotgan Mustaqillik kuni bilan samimiy tabrikladi.