Davlatimiz rahbari Xorazmdagi “Urganch klaster”ning yangi korxonalari faoliyati bilan tanishdi.

Klasterning tashkil etilganiga besh yil boʻlgan. Bugun u paxta xomashyosini yetishtirishdan tortib tayyor kiyim-kechak tikishgacha boʻlgan barcha jarayonlarni qamrab olgan yaxlit “zanjir”. Uning tizimida 3 ming kishi ish bilan taʼminlangan.

Tadbirkor 8 ming 500 gektar maydonda yetishtirilgan paxtani 100 foiz qayta ishlaydi. Buning uchun paxta tozalash va yogʻ zavodlari bor.

Shu kunlarda klasterning ip-yigiruv hamda mato toʻqish quvvati ortdi. Qoʻshimcha investitsiya evaziga yana ikkita korxona faoliyati yoʻlga qoʻyildi. Germaniya, Yaponiya va Turkiyadan zamonaviy uskunalar keltirib oʻrnatildi.

Korxonada oʻquv-tajriba markazi tashkil etilgan. Tikuvchi va dizayner-mutaxassislar avval shu yerda oʻqitilib, keyin ishga qoʻyiladi.

Bularning natijasida ishlab chiqarish hajmi sezilarli ortdi. Yiliga 10 ming 800 tonna atrofida ip-kalava va 3 million dona tikuvchilik mahsulotlari tayyorlash quvvati yaratildi.

Prezident Shavkat Mirziyoyev yangi fabrikalarda boʻlib, ish jarayoni, tayyor mahsulotlarni koʻzdan kechirdi. Tikuvchi xotin-qizlar bilan suhbatlashdi. Ularning oylik maoshlari, mehnat sharoitlari bilan qiziqdi.

Bu yerda tayyorlanayotgan yuqori sifatli kiyim-kechaklarning katta qismi eksportga yoʻnaltiriladi. Korxonaning yillik eksport salohiyati 28 million dollar atrofida.

Mahsulotlar turi va sifatini koʻpaytirib, eksport koʻlamini kengaytirish, energiya tejamkorlik orqali mahsulot tannarxini kamaytirish boʻyicha tavsiyalar berildi.