Joriy yilning 20-oktyabr kuni Senatning Yoshlar, xotin-qizlar, madaniyat va sport masalalari qoʻmitasi tashabbusi bilan seminar tashkil etildi.

Unda senatorlar, xalqaro nufuzli tashkilotlar rahbarlari, vazirlik va idoralar masʼullari, ekspertlar hamda Yoshlar parlamenti aʼzolari ishtirok etdi.

Seminar doirasida “BMT-ayollar” tashkiloti, Birlashgan Millatlar Tashkilotining Inson huquqlari boʻyicha Oliy komissari boshqarmasining Markaziy Osiyo uchun mintaqaviy boʻlinmasi hamda Yevropada Xavfsizlik va Hamkorlik Tashkilotining (YXHT) Oʻzbekistondagi loyihalari koordinatori tomonidan ishlab chiqilayotgan “Oʻzbekistonda oilaviy zoʻravonlikka qarshi huquqiy choralar bilan kurashish” qoʻshma loyihasi taqdim etildi.

“BMT-ayollar” tuzilmasining Markaziy Osiyodagi aloqalar boʻyicha ofisi rahbari Jeren Guven Guresh xonim loyihaning mazmun-mohiyati va konsepsiyasi bilan batafsil tanishtirdi.

Taʼkidlanganidek, loyiha sohada amalga oshirilayotgan soʻnggi huquqiy islohotlar va gender tengligini taʼminlash hamda gender asosidagi zoʻravonlikni bartaraf qilish boʻyicha davom etayotgan saʼy-harakatlarni yanada rivojlantirishga xizmat qiladi.

Loyiha oilaviy zoʻravonlikdan jabr koʻrganlarga adliya choralarini kuchaytirish, shuningdek, adliya va huquqni muhofaza qilish sohalarida institutsional hamkorlik hamda hisobdorlikni ragʻbatlantirishni ham nazarda tutadi.

Seminar davomida taklif etilayotgan loyihaga umumiy yondashuvlar va undan kutilayotgan natijalar, loyiha tatbiq etiladigan hududlar hamda tashkiliy masalalar koʻrib chiqilib, mutasaddi vazirlik-idoralar vakillarining fikrlari eshitildi.

Loyihani bildirilgan taklif va fikr-mulohazalardan kelib chiqib, qayta koʻrib chiqish va yanada takomillashtirishga kelishib olindi.