Xabaringiz bor, ijtimoiy tarmoqlarda xonanda Sanjay taxallusi bilan ijod qilayotgan Javberdiyev Sanjar Oʻzbekiston xalq artisti Sherali Joʻrayevning qoʻshiqlari matnini huquq egalarining ruxsatisiz oʻzgartirgan holda ijro etgani sababli Adliya vazirligi huzuridagi Intellektual mulk agentligiga chaqirtirilgani haqidagi video yozuvlar tarqalgan edi. 

Sababi, Intellektual mulk agentligi Mulkiy huquqlarni jamoaviy asosda boshqaruvchi tashkilotning murojaati asosida S.Javberdiyev tomonidan sheʼr muallifi U.Azimov hamda Oʻzbekiston xalq artisti Sh.Joʻrayev ijrosidagi “Karvon” nomli qoʻshigʻini va sheʼrini asar yaxlitligini buzgan holda mualliflarning roziligisiz ijro etilgan holatlarni aniqlagan hamda Sanjayga nisbatan Maʼmuriy huquqbuzarlik toʻgʻrisidagi bayonnoma rasmiylashtirilib, maʼmuriy javobgarlik masalasini koʻrib chiqish uchun tegishli sudga kiritilgan.

2021-yil 9-mart kuni Navoiy viloyati Jinoyat ishlari boʻyicha Navoiy shahar sudi tomonidan xonanda Sanjar Javberdiyev (Sanjay)ga nisbatan OʻzR MJtK 177-(1)-moddasi birinchi qismi boʻyicha bazaviy hisoblash miqdorining 3 baravari (669 000 soʻm) miqdorida jarima jazosi tayinlandi.

Eslatib oʻtamiz, Oʻzbekiston Respublikasi qonunchiligida “cover” ijro tushunchasi kiritilmagan. Xorijiy davlatlarda “cover” ijro mavjud. Bu boʻyicha taraflar shartnoma asosida faoliyat yuritishadi. Yaʼni oʻzganing asarini cover sifatida ijro qilmoqchi boʻlgan ijrochi muallifdan ruxsat soʻragan holda shartnoma tuzishi hamda shartnoma boʻyicha huquq egasiga mualliflik haqini toʻlashi lozim.