Hukumat qarori bilan “Qoraqalpogʻiston Respublikasi, viloyatlar va Toshkent shahridagi canoat zonalari direksiyalari sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun yer uchastkalarining ijara huquqi bilan ulushdor boʻlib kirish tartibi toʻgʻrisida”gi nizom tasdiqlandi.

Mazkur nizom Oʻzbekistondagi sanoat zonalari direksiyalari sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish uchun yer uchastkalarining ijara huquqi bilan ulushdor boʻlib kirish tartibini belgilaydi.

Bildirilishicha, sanoat zonalariga ishtirokchilarning xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish uchun yer uchastkalarining ijara huquqi bilan ulushdor boʻlib kirish qiymati 100 ming AQSH dollari ekvivalentidan ortiq boʻlgan xizmat koʻrsatishni tashkil etish loyihalari uchun amal qiladi.

Xoʻjalik jamiyatining ustav fondiga kiritish belgilangan yer uchastkasi direksiyaning mulki sifatida davlat roʻyxatidan oʻtkazilgan boʻlishi lozim.

Shuningdek, yer uchastkasining ijara huquqi qiymati shaklidagi direksiya ulushi xoʻjalik jamiyati ustav fondining 49 foizidan oshmasligi shart.

Xoʻjalik jamiyatining ustav fondidagi ishtirokchilarning birgalikda faoliyat yuritish shartlari investitsiya bitimida belgilanishi lozim.