Abdulaziz YOʻLDOSHEV/“Xalq soʻzi”. Samarqand agroinnovatsiyalar va tadqiqotlar instituti kartoshka urugʻchiligini rivojlantirish borasida Janubiy Koreya Respublikasi qishloq xoʻjaligi, oziq-ovqat va qishloq hududlarini rivojlantirish vazirligi, Koreya qishloq hududlarni rivojlantirish korporatsiyasi bilan hamkorlikda besh yillik loyiha imzolagan. Loyiha doirasida institutda gidroponik-issiqxona, In-vitro laboratoriyasi va omborxonalar qurildi.

Qishloq xoʻjaligi vazirligi vakillari, oliy taʼlim muassasalari professor-oʻqituvchilari hamda Janubiy Koreya, Yaponiya davlatlaridan mehmonlar ishtirokida In-vitro laboratoriyasi va gidroponikali issiqxonalarning ochilish marosimi boʻlib oʻtdi.

— Institutdagi gidroponikali issiqxonaga koreyalik mutaxassislar, institut olimlari va tadqiqotchilar birgalikda dastlabki mikrotuganaklarni ekishdi, — dedi institut rektori Shavkat Hasanov. — Dastlabki, tadqiqotlarda respublikamizda keng tarqalgan 3 ta nav, jumladan, “Pikasso”, “Sante” va “Nevskiy” navlari sinovdan oʻtkazilmoqda. Kelgusida ushbu markazda intensiv usulda respublikamiz iqlim sharoitiga mos navlarni va ularning sogʻlom yuqori sifatli urugʻlarini ishlab chiqish hamda sohada kadrlar salohiyatini bosqichma-bosqich oshirib borish rejalashtirilgan.

— Chetdan keladigan kartoshka urugʻchiligini Oʻzbekistonda yetishtirish maqsadida ushbu loyihani boshladik, — dedi Xalqaro bogʻdorchilik instituti direktori, professor Lee YB. — Maqsadimiz kartoshka urugʻchiligi borasida salohiyatli kadrlarni yetishtirishdan iborat. Samarqand sharoiti kartoshka yetishtirishga mos hudud. Institutning yetuk olimlari va tadqiqotchilari bilan zamonaviy issiqxonalarda tadqiqotlar olib boryapmiz.

— Bir gektar kartoshkadan olinayotgan hosildorlik bizda 17-18 tonna atrofida edi, — dedi institut kafedra mudiri, professor Sobir Sanayev. — Shu kecha-kunduzda respublikada bir gektardan olinayotgan hosildorlik 30 tonnagacha koʻtarildi. Bu kartoshka ekinida olib borilayotgan tadqiqotlar va ilmning natijasidir. Bugungi kunda xorijdan keltirilayotgan kartoshka urugʻlarining bir kilogrammi oʻrtacha 15-20 ming soʻmni tashkil qilsa, 1 gektar yerga 3,5-4 tonna urugʻ ekilishini hisobga olsak, bu 70 million soʻm boʻladi. Xorijdan olib kelayotgan kartoshka urugʻlarini arzonlashtirish va dehqonlarning daromadini oshirish maqsadida kartoshka urugʻchiligini oʻzimizda tayyorlashni maqsad qilganmiz.