Samarqand viloyati Kattaqoʻrgʻon tumanida bir paytning oʻzida 17 nafar masʼul mansabdor shaxslarga nisbatan 57 mln 800 ming soʻm miqdorida maʼmuriy ish qoʻzgʻatildi. Bu haqda viloyat Ekologiya boshqarmasi axborot xizmati xabar berdi.

Maʼlum qilinishicha, Kattaqoʻrgʻon tuman inspeksiyasi davlat inspektorlari tomonidan tumanida kuzatuv nazorat tadbirlari olib borilgan. Tadbirlar davomida tumandagi korxona va tashkilotlar tomonidan kuz va bahor mavsumida “Yashil makon” umummilliy loyihasi doirasida ekilgan daraxt koʻchatlarini oʻz vaqtida sugʻorish va agrotexnik tadbirlarini olib bormaganlik oqibatida bir necha hududlarda daraxt va butasimonlar qurib qolgani aniqlangan.

“Shu boisdan eʼtiborsizligi va daraxtlarni suvsizlik hamda kasallanishiga qarshi oʻz vaqtida agrotexnik tadbirlarni olib bormagani sababli bir paytning oʻzida tumandagi 17 nafar masʼul mansabdor shaxslarga Maʼmuriy javobgarlik toʻgʻrisidagi kodeksning 79-moddasi 3-qismiga binoan 57 mln 800 ming soʻm miqdorida maʼmuriy ish qoʻzgʻatilib, tegishli hujjatlar tuman prokuraturasiga taqdim etilgan”, deyiladi xabarda.