“Samarqand viloyatini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish toʻgʻrisida”gi Prezident qarori (PQ–392-son, 27.12.2025-y.) qabul qilindi. Bu haqida “Huquqiy axborot” Telegram-kanali xabar berdi.

Qarorga koʻra, Samarqand viloyatida drayver loyihalarni amalga oshirish uchun zarur shart-sharoitlarni yaratish boʻyicha quyidagilarni nazarda tutuvchi manzilli dastur tasdiqlandi, jumladan:

• xalqaro, davlat va mahalliy ahamiyatga ega hamda ichki xoʻjaliklararo 298 km avtomobil yoʻllari hamda 15 ta yoʻl oʻtkazgichni qurish, rekonstruksiya qilish va taʼmirlash;
• 14 ta tuman (shahar)da 1 ta podstansiyani taʼmirlash, 70 ta transformator punktini oʻrnatish, 137 km elektr tarmoqlarini yangilash;
• ichimlik suvi va oqova suv tizimini yaxshilash uchun 14 ta tumanda 90 ta suv inshooti, 242 km suv tarmogʻini qurish va taʼmirlash.

2026-yil 1-iyuldan Samarqandda:

• qishloq xoʻjaligi korxonalari tomonidan toʻlanadigan suv resurslaridan foydalanganlik uchun soliq tushumlari toʻliq tuman (shahar) suv korxonalari ixtiyoriga oʻtkaziladi;
• suv tejovchi texnologiyalarni joriy etish maqsadida talabgorlarga paxta maydonlarida joriy etilgan tomchilatib sugʻorish tizimlari uchun belgilangan tartibda har bir gektariga 12 mln soʻmdan subsidiya beriladi.

2026-yil 1-yanvardan viloyatdagi qurilish, taʼmirlash va modernizatsiya qilish loyihalari qatʼiy ravishda “yashil” tamoyillar va energiya samaradorligi boʻyicha minimal talablar asosida amalga oshiriladi.

2026/2027 oʻquv yilidan Kattaqoʻrgʻon davlat pedagogika institutida Toshkent shahridagi Turin politexnika universiteti bilan hamkorlikda muhandislik yoʻnalishlari boʻyicha fakultet tashkil etish choralari koʻriladi.