Foto: “Xalq so‘zi”

Buxoro viloyati Shofirkon tumani “Bobohaydar” mahalla fuqarolar yig‘inidagi  Regiyon qishlog‘ida yakka-yolg‘iz yashovchi, nogironligi bo‘lgan keksa ayol Sarvar aya  Rajabovaning uyiga yangi gaz hisoblash uskunasi o‘rnatildi. O‘rnatildi-yu, lekin gazdan darak bo‘lmadi. Uy sovuq, mana, izg‘irinli kunlar ham boshlanyapti. Bu sharoitda qanday kun o‘tkazish va salomatlikni asrash mumkin?

Ayol "Shofirkontumangaz" gaz taʼminoti bo‘limiga bir necha bor murojaat qildi. Bo‘lim xodimlari har gal unga  tabiiy gaz uchun 2012-2013 yildan qolib ketgan qarzdorligi  borligini, qarz to‘langanidan so‘ng yangi gaz hisoblash uskunasi avtomatik tarzda faol holatga kelishini aytishdi. Sarvar aya esa aslida bu asossiz qarzdorlik ekanligini uqtirar, ammo masalaga  aniqlik kiritish hech kimning xayoliga kelmasdi.

-Sarvar Rajabova shunday sarsongarchilikdan so‘ng yordam so‘rab qabulxonamizga murojaat qildi,- deydi O‘zbekiston Respublikasi Prezidentining Shofirkon tumanidagi Xalq qabulxonasi mutaxassisi S. Normurodov. - Masala darhol Xalq qabulxonasi mudiri F. Hafizov boshchiligida soha mutaxassislari, mahalla raisi va mahalliy Kengash deputati jalb qilingan holda atroflicha o‘rganildi.

 Isteʼmolchining gaz hisobi va to‘lovi bo‘yicha hujjatlari “Shofirkontumangaz” gaz taʼminoti bo‘limi tizimidagi mavjud to‘lov varaqalari bilan solishtirilganida Sarvar Rajabovaning haqligi aniqlandi. Solishtirish jarayonida yuzaga kelgan  tafovutga aniqlik kiritish maqsadida kerakli hujjatlar jamlanib, ortiqcha summani chegirish uchun Buxoro viloyati hududiy gaz  tashkilotiga yuborildi va fuqaroning tabiiy gaz taʼminoti bilan bog‘liq muammosi hal etildi.

Ha, yolg‘iz yashovchi, bir mushtipar ayolning ko‘ngli nihoyat, xotirjam tortdi. Sakkiz yil avvalgi anglashmovchilikka barham berildi. Lekin shu masalani o‘z vaqtida hal etish uchun birovning boshi og‘rimaganiga hayron qolasan kishi. Buyog‘i “Shofirkontumangaz” gaz taʼminoti bo‘limida ishlovchilarning vijdoniga havola, albatta.

Istam IBROHIMOV, “Xalq so‘zi”