Mass-media fondi Vasiylik kengashi raisi oʻrinbosari Saida Mirziyoyeva oʻzbekistonlik va turkiyalik ijodkorlar hamkorligida yaratilgan hamda kecha taqdimoti boʻlib oʻtgan yangi koʻp qismli “Mendirman Jaloliddin” tarixiy badiiy filmi haqida oʻz fikrlarini bildirib oʻtdi:

"Otam Samarqand viloyatining hokimi lavozimiga tayinlanib, biz Jizzaxdan Samarqandga koʻchib kelganimizda, bu shahar menda qanday taassurot qoldirganini juda yaxshi eslayman. Otam ozgina boʻsh vaqt topdilar deguncha, bizga Samarqandni koʻrsatar, tarixiy obidalar bilan tanishtirar va buyuk tarixiy shaxslar haqida soʻzlab berar edilar. Boʻsh vaqtimda tez-tez oʻsha qadimiy maskanlarni ziyorat qilar, buyuk qahramonlar hayotini oʻrganar edim. Shohi Zinda, Bibixonim, Registon maydonida yurar ekanman, xayolimda oʻsha tarixiy davrlarni tasavvur qilar edim. Goʻyo atrofimda bir necha asr oldingi hayot qaynayotgandek, sershovqin bozorlar, otlarning kishnashi va saroy sahnalari... 

Tasavvurimdagi oʻsha ajib voqealar xotiramda bir umrga muhrlanib qolgan. 
Va bir kun kelib, imkoni boʻlishi bilanoq, ushbu tarixiy shaxslar haqida biron film olinishiga oʻz hissamni qoʻshaman, degan niyat boʻlar edi. Chunki, faqat filmlar orqaligina oʻsha manzarani tasvirlab berish mumkin, deb oʻylardim. Bir soʻz bilan aytganda, mening tarixga boʻlgan qiziqishim aynan Samarqanddan boshlangan. 

Yillar oʻtib, taqdir taqozosi bilan men Oʻzbekiston imidjini xorijiy davlatlarda shakllantirish, matbuot va targʻibot ishlariga masʼul boʻlib faoliyat yuritishni boshladim. Va shu asnoda, bundan bir yarim yil oldin hozirgi madaniyat vazirimiz Ozodbek Nazarbekov Xorazmshoh Jaloliddin Manguberdi haqidagi serialni turk hamkasblari bilan suratga olish taklifini berdi. Albatta, biz bu gʻoyani qoʻllab quvvatladik. Chunki, oʻzingiz yaxshi bilasiz, afsuski oʻzbek milliy kinochiligida tarixiy shaxslar, buyuk allomalarimiz hayotiga bagʻishlangan seriallar deyarli yoʻq darajada. Seriallar yaratilishi esa nafaqat tarixni oʻrganish, balki buyuk bobolarimiz hayoti bilan yaqindan tanishish imkonini beradi. Bunday seriallar har bir oʻzbek millati vakilida milliy gʻururni shakllantiradi, oʻzbek xalqining qaddini yana-da baland koʻtaradi. 

Jarayon boshlandi. Orient Finans Bank bu loyihani toʻliq moliyalashtirishga rozi boʻldi. Turkiya ijodkorlari bilan hamkorlikda 30 gektarlik yerda suratga olish maydonlari yaratildi, Jaloliddin saroyi, jang maydonlari barpo etildi, oʻsha davrdagi milliy kiyimlarimiz, urf-odat va anʼanalarimizning har bir detallariga alohida yondashuv boʻldi. Oʻzbek va turk aktyorlari esa qilichbozlik, otda jang qilishdan tortib, to kunlik jismoniy tayyorgarlikni ham oʻtadilar. Hammasi juda yaxshi ketayotgan edi, lekin birdaniga pandemiya balosi bizning ishga ham jiddiy zarar keltirdi. Karantin davrida suratga olish ishlari rejadan chiqib ketdi. Qanchadan qancha ijodkorlar Turkiyada yashab, oʻsha yerda sabr qilishiga toʻgʻri keldi. Ochigʻini aytaman, men bu loyihamiz bu yil yakunlanishiga shubha qila boshladim. Lekin Allohning qoʻllab-quvvatlashi, fidoyi ijodkorlarimizning saʼy-harakati bilan mana, bugun taqdimot kunigacha ham yetib keldik. 

Bugun ushbu serialning birinchi qismini namoyish qildik. Albatta, bu serial turli bahs, munozara, balki tanqidlarga ham uchrar. Biz bunga tayyormiz. Biz fikrlar xilma-xilligini qoʻllab-quvvatlaymiz. Har bir fikrni hurmat qilamiz. Va nima boʻlganida ham, oldimizga qoʻygan har bir rejamizni oxiriga yetkazamiz. Bu loyihani ham uddalay oldik, deb oʻylayman. Buning uchun barcha ijodkorlarga, aktyorlarimizga, homiy Orient Finans Bank rahbariyatiga, Madaniyat vazirligiga va shaxsan Ozodbek Nazarbekov hamda loyiha bosh prodyuseri Mehmet Boʻzdagʻga minnatdorlik bildirmoqchiman. 

Yana bir bor gʻurur bilan aytaman, biz uddaladik!"