Fanlar akademiyasi va sogʻliqni saqlash vazirligi mutasaddilari ishtirokidagi matbuot anjumanida Rutan haqida maʼlumot berildi.

Qayd etilishicha, Rutan preparati antioksidantlik va antigipoksik xususiyatlarga ega boʻlib, SARS-COV-2 virusining 2 ta muhim ferment tizimini ingibirlaydi.

Virusning hujayrada koʻpayishi va tarqalishi hamda patologik va yalligʻlanish jarayonini chaqiruvchi oqsillar hosil boʻlishini toʻxtatadi va kasalliklarda salbiy holat — «sitokinin boʻroni»ning oldini oladi. Natijada, SARS-CoV-2 virusiga chalingan bemorlarning sogʻayish muddati qisqaradi va bemor oʻz holatiga tez qaytadi.

Rutan preparati 103 ta koronavirus infeksiyasi bilan kasallangan oʻrtacha ogʻirlikda kechayotgan bemorlarda qayd etilgan dozada sinalganda, SOVID-19 orqali chaqirilgan yalligʻlanish jarayonining asosiy vositachisi boʻlmish S-reaktiv oqsili miqdorining statistik ahamiyatli kamayishi kuzatildi va bu orqali uning aniq yalligʻlanishga qarshi taʼsirga ega ekanligi aniqlandi. Rutan qabul qilgan biron-bir bemorga kasallik davomida oksigenatsiyaga muhtojlik boʻlmadi.

Rutan preparatini qabul qilgan sinov guruhi bemorlarini protokol davolash fonida kasallikning 4-5 kuni davomida ulardan SOVID -19 virusiga olingan PZR-test tahlili salbiy boʻldi.

Klinik sinov natijalariga koʻra, «Rutan tabletkalari, 0,1 g» №20 oʻrtacha ogʻirlikda kechayotgan oʻpka yalligʻlanishi 30% boʻlgan COVID-19 kasalligiga hamda grippning barcha shtammlariga qarshi dori vositasi sifatida qoʻllash uchun ruxsat etildi.