Foto: Paralimpiya qoʻmitasi

Oʻzbekistonlik para pauerliftingchi Ruxshona Oʻktamova Jahon rekordini yangiladi. Bu haqda Oʻzbekiston Milliy paralimpiya qoʻmitasi axborot xizmati xabar berdi.

«Ayni kunlarda Gruziya poytaxti Tbilisi shahrida para pauerlifting boʻyicha jahon kubogi boʻlib oʻtmoqda. Unda Oʻzbekiston terma jamoasi aʼzolari muvaffaqiyatli ishtirok etmoqda», deyiladi Qoʻmita xabarida.

Maʼlum qilinishicha, yoshlar oʻrtasida -61 kg. vazn toifasida bahslarga kirgan hamyurtimiz Ruxshona Oʻktamova 109 kg. natija qayd etgan holda oltin medalni qoʻlga kiritgan. Eʼtiborli jihati, vakilimiz ushbu natija orqali oʻziga tegishli boʻlgan yoshlar oʻrtasidagi Jahon va Qitʼa rekordini ham yangilashga muvaffaq boʻlgan.

Shuningdek, erkaklar oʻrtasida -72 kg vazn toifasida Oʻzbekiston sharafini himoya qilgan Bekzod Jamilov umumiy 623 kg natija qayd etgan holda musobaqaning bronza medaliga sazovor boʻlgan.

Taʼkidlash kerakki, 27-iyun kuniga qadar davom etadigan ushbu musobaqa Parij-2024 yozgi Paralimpiya oʻyinlariga muhim reyting ochkolari taqdim etuvchi soʻnggi xalqaro musobaqa hisoblanadi. Unda 15 nafar oʻzbekistonlik para pauerliftingchi ishtirok etmoqda.