“Здравоохранение России” jurnalida Oʻzbekiston oliy taʼlim, fan va innovatsiyalar vaziri Ibrohim Abdurahmonov bilan intervyu chop etildi.

Suhbatda mamlakatimizda aholi turmush sharoitini yaxshilash va fuqarolar salomatligini asrashga xizmat qiluvchi olimlarning ilmiy izlanishlari va ishlanmalari, Rossiya ilmiy hamjamiyati bilan oʻzaro aloqalar haqida fikr yuritilgan.

“Oʻzbekiston Markaziy Osiyodagi yirik ilmiy markaz hisoblanadi, deydi Oliy taʼlim, fan va innovatsiyalar vazirligi rahbari ushbu suhbatda. Mamlakat rivojlangan ilmiy-tadqiqot moddiy-texnik bazasiga, salmoqli intellektual salohiyat, yuqori malakali kadrlarga ega. Ayni paytda Oʻzbekistonda 360 dan ortiq akademik, oliy oʻquv yurti va sohaga oid muassasalarda 35 mingga yaqin kishi ilmiy-tadqiqot faoliyati bilan shugʻullanmoqda”.

Intervyuda Oʻzbekistonda amalga oshirilayotgan ilmiy-innovatsiya faoliyati chuqur fundamental tadqiqotlar, ustuvor amaliy va innovatsion ilmiy-texnikaviy ishlanmalarni qamrab olgani, ular mamlakatni ijtimoiy-iqtisodiy rivojlantirishning dolzarb muammolarini hal etishga qaratilganligi qayd etilgan. “Bunda oʻzbek ilm-fani salohiyatidan toʻliq foydalanish asosiy vazifadir”, deydi vazir.

Ibrohim Abdurahmonov Oʻzbekiston va Rossiya olimlarining oʻzaro hamkorligiga  toʻxtalar ekan, Oʻzbekiston Fanlar akademiyasi Bioorganik kimyo institutining rossiyalik hamkasblari bilan yangi avlod rekombinant toksinlarini yaratish boʻyicha olib borayotgan qoʻshma ilmiy izlanishlarini  alohida  qayd etadi.