2024-yil boshida ijtimoiy tarmoqlarda ayol yosh bolani ayovsiz kaltaklayotgani va yana bir tasvirda shu bolani ayol va erkak yerga koʻmayotgani videolari keng muhokamalarga sabab boʻlgan edi.

Maʼlumotlarga koʻra, bu ayol Andijon viloyati Jalaquduq tumanida yashovchi A.G. boʻlib, 2016-yildan beri Rossiyaning Novosibirsk shahrida turmush oʻrtogʻi B.I. bilan yashab kelgan. Videotasvirdagi bola esa ularning 2019-yilda tugʻilgan qizi R.X. boʻlgan.

Oʻzbekiston bolalar ombudsmani Bosh prokuraturaga kiritgan soʻrovi asosida Rossiya Tergov qoʻmitasining Novosibirsk shahri tergov boshqarmasi tomonidan A.G.ga nisbatan Rossiya Jinoyat kodeksi 117-moddasi (qiynash) bilan jinoyat ishi qoʻzgʻatilgandi.

Rossiya Federatsiyasi Tergov Qoʻmitasining axborotiga koʻra, mazkur jinoyat ishi sud tomonidan koʻrib chiqilib, A.G. RF JK 117-moddasi 2-qismi “g“ bandida nazarda tutilgan jinoyatni sodir etganlikda aybdor deb topilib, 4 yilga ozodlikdan mahrum qilingan hamda jazoni umumiy tartibli koloniyada oʻtash belgilangan.

Maʼlum boʻlishicha, qiynoqlardan aziyat chekib kelgan 1,5 yashar bola 2021-yil avgustida vafot etgan. Onasi tibbiy muassasaga xabar bermay, bolani oʻzboshimchalik bilan koʻmgan.