Ruminiya Rossiyaning uchuvchisiz samolyoti mamlakat havo hududini buzgani uchun Moskvaning masʼuliyatsiz harakatlarini qattiq qoraladi.

Mudofaa vazirligi maʼlumoticha, Ukrainaga qarshi hujumlarda qoʻllanilgan rus droni shanba kuni mahalliy vaqt bilan soat 18:05 da Ruminiya osmoniga kirgan. Dron shimoliy Dobrujada havo patrul missiyasini bajarayotgan ikkita F-16 qiruvchi samolyoti tomonidan toʻxtatilgan va hatto uni urib tushirishga yaqin qolgan.

Hodisa oʻtgan hafta Polsha osmoniga kirgan rus dronlari urib tushirilganidan soʻng, NATO sharqiy qanotida mudofaa tizimini kuchaytirish chaqiriqlari ortidan sodir boʻldi.

Ruminiya mudofaa vazirligiga koʻra, uchuvchisiz samolyot taxminan 50 daqiqa milliy havo hududida boʻlib, keyin Pardina shahri yaqinidan Ukraina tomon yoʻnalgan.

Rossiya Mudofaa vazirligi hozircha bu iddaolarga izoh bermadi.

Ruminiya hukumati bu voqeani Qora dengiz mintaqasida xavfsizlikka tahdid sifatida baholab, Rossiya xalqaro huquq normalariga hurmat bilan munosabatda emasligini taʼkidladi.

Mudofaa vaziri Ionut Mosteanu maʼlum qilishicha, Tashqi ishlar vazirligi Rossiya elchisi Vladimir Lipayevni chaqirtirgan. Lipayev esa bu voqeani “Kiyevning provokatsiyasi” deb atagan.

YIning tashqi siyosat va xavfsizlik boʻyicha oliy vakili Kaya Kallas Ruminiya havo hududining buzilishini Yevropa davlatlari suverenitetiga nisbatan navbatdagi noqonuniy harakat sifatida baholadi.

Ukraina prezidenti Vladimir Zelenskiy ham voqeaga munosabat bildirib, rus droni Ruminiya hududiga taxminan 10 kilometr kirib kelganini va NATO osmonida qariyb bir soat harakat qilganini qayd etdi. U yana bir bor Rossiyaga qarshi sanksiyalar va jamoaviy mudofaa zarurligini taʼkidlab:

“Qaror qabul qilish uchun kimdir qurbon boʻlishi shart emas”, — deya taʼkidladi Zelenskiy.