Videodan kadr

Qozogʻistonda qidiruvda boʻlgan 22 yoshli yigit Toshkent shahrida qoʻlga olindi. Bu haqda “Politsia.kz” xabar berdi.

Maʼlum qilinishicha, Jambil viloyati politsiya boshqarmasining topshirigʻi asosida va Oʻzbekiston Ichki ishlar vazirligi xodimlari koʻmagida, Toshkent shahrida tezkor tadbir oʻtkazilgan. Unda Taraz shahrida yashovchi 22 yoshli yigit qoʻlga olingan. Maʼlum boʻlishicha, u 2022-yil oxirida tanishining ishonchiga kirib, jami 24 million tenge (taxminan 612 million soʻm)dan ziyod qiymatga ega 4 ta avtomobilni oʻzlashtirib, keyinchalik ularni uchinchi shaxslarga sotib yuborgan.

Bundan tashqari, Olmaota shahrida Turkiston viloyatida yashovchi ikki nafar mahalliy fuqaro qoʻlga olingan. Ular Arys tumanida boshqa bir fuqarodan jismoniy kuch ishlatish yoʻli bilan 3,4 million tenge (taxminan 86,7 million soʻm) pul va bitta avtomobilni tortib olganlikda gumon qilinmoqda.

Xabarda keltirilishicha, 2025-yilning may oyida Qozogʻiston Ichki ishlar vazirligi tomonidan jinoiy javobgarlikdan yashirinayotgan 140 dan ortiq fuqaro aniqlanib, qoʻlga olingan. Aniqlik kiritilishicha, qidiruvda boʻlganlarning sakkiz nafari xorijiy davlatlarda ushlangan.

Mamlakat IIV vakillarining taʼkidlashicha, jinoyat sodir etgan shaxslarni qidirish va hibsga olish ishlarini faol olib bormoqda. va vaziyat vazirlik nazoratida turibdi.