Oliy Majlis Senatining Byudjet va iqtisodiy masalalar qoʻmitasining Qoraqalpogʻistonning Qoraoʻzak tumanida oʻtkazilgan sayyor majlisida aholini ish bilan band qilish boʻyicha olib borilayotgan ishlar holati muhokama qilindi.

Taʼkidlanganidek, mamlakatimizda aholini turmush farovonligini oshirish, ayniqsa, aholi bandligini taʼminlashga qaratilgan koʻplab loyihalar, dasturlar ishlab chiqilib, tadbirkorlik faoliyatini boshlash niyatida boʻlgan fuqarolar uchun keng imkoniyatlar yaratilmoqda.

Qoʻmita aʼzolari oʻz chiqishlarida oʻtgan qisqa davrda amalga oshirilgan islohotlar, ayniqsa, tadbirkorlik rivojiga qaratilayotgan eʼtibor hayotimizning barcha jabhalarida yangilanish va tub oʻzgarishlarga zamin yaratib, jamiyatimizning ijtimoiy-iqtisodiy hamda madaniy-maʼrifiy manzarasi butunlay oʻzgarganini taʼkidlab oʻtdi.

Xususan, joriy yilning oʻtgan davrida 3,7 ming aholini daromadli mehnat bilan band qilish rejasi 129 foizga bajarilgan. Jumladan, tijorat banklari tomonidan aholining 2,6 mingi, qishloq xoʻjaligi yoʻnalishida 1,2 mingi hamda investitsiya loyihalari hisobiga 800 dan ziyod kishi ish bilan taʼminlangan.

Birgina “Mahalla” loyihasi doirasida 21,5 mlrd soʻm, “Kichik biznesni uzluksiz qoʻllab-quvvatlash” dasturi doirasida 11,9 mlrd soʻm, “Oilaviy tadbirkorlik” dasturi doirasida 9,7 mlrd soʻm hamda “Biznesga birinchi qadam” dasturi doirasida 6,9 mlrd soʻm kreditlar ajratilgan.

“Kambagʻal oilalar reyestri”ga kiritilgan 1 mingta oilani kambagʻallikdan chiqarish boʻyicha 9,1 mingta individual reja tuzilgan. Ushbu rejalar doirasida 4,2 ming aholi yoki 907 ta kambagʻal oilaga daromadni oshirishga qaratilgan 1,5 mingta xizmat koʻrsatilgan.

Shuningdek, senatorlar majlisda oliy taʼlim muassasalari bitiruvchilari bandligini taʼminlash borasida amalga oshirilgan ishlarga ham toʻxtalib oʻtdi. Jumladan, tumandan ijtimoiy soha yoʻnalishidagi oliy taʼlim muassasalarini tamomlagan 287 nafar bitiruvchining bandligi taʼminlangan.

Muhokama jarayonida senator va deputatlar tomonidan tumanda aholini ish bilan band qilishda oʻz yechimini kutib turgan masalalar, shuningdek, yoʻl qoʻyilgan xato va kamchiliklar koʻrsatib oʻtildi.

Majlis soʻnggida tumanda aholini ish bilan band qilish va mavjud imkoniyatlardan samarali foydalanish hamda kambagʻallikni qisqartirish orqali turmush darajasini yaxshilash yuzasidan tavsiyalar berildi.