Foto: Fargʻona viloyati IIB

Fargʻona viloyati Qoʻqon shahridagi xonadonlardan birida parvarishlab kelinayotgan 47 tup koʻknori fosh boʻldi. Bu haqda viloyat IIB axborot xizmati xabar berdi.

Qayd etilishicha, Qoʻqon shahrida oʻtkazilgan “Qoradori-2025” tezkor tadbiri davomida “Ashirqulmergan” mahallasida yashovchi 60 yoshli Yo.X.ning xonadoni xolislar ishtirokida koʻzdan kechirilgan. Tekshiruv jarayonida ushbu shaxs tomorqasida 47 tup koʻknori oʻsimligini parvarishlab kelayotgani aniqlangan.

Bundan tashqari Dangʻara tumani IIO xodimlari tomonidan tuman hududida oʻtkazilgan tezkor tadbirda yuqoridagi kabi holatlardan yana biri aniqlangan. Maʼlum boʻlishicha, “Qashqar” mahallasida yashovchi 49 yoshli ayol yashash xonadonida 118 tup agrotexnik ishlov berilgan koʻknori giyohvandlik oʻsimliklariga oʻxshash oʻsimlikni ekib, parvarishlab kelgan.

Hozirda mazkur holatlar yuzasidan Jinoyat kodeksining 270-moddasi bilan jinoyat ishi qoʻzgʻatilib, dastlabki tergov harakatlari olib borilmoqda.

“Hurmatli fuqarolar giyohvand moddalarni yetishtirish jinoiy javobgarlikka sabab boʻladi. Ogoh boʻling!”, deyiladi IIB xabarida.